Le mie poesie

Sabato 26 marzo 2016

GRUPPO SPETTACOLO ARCOBALENO

“A VASACRA”
Testi di Don Sandro Bernunzo e Carmelo Prof. Orofino

Prologo

Trentatré anni dopu timpu aviva,
quannu di ‘ncilu a stu munnu calava,

u tistamintu iddu si faciva,
pirchì la morti so si giudicava.

Tannu dudici Apustuli tiniva,
tannu u munnu ‘nteru firriava

l’angiulu santu chi iva e viniva
chi i risposti di Ddi ci purtava

ENTRATA A GERUSALEMME

Tanta genti ava sintuti diri
Chi chiddu chi leva ogni patiri

A Gerusalemmi ava ‘rrivatu
Comu nu Re di ‘nu regnu assai cchiu atu…

…e a genti chi ‘dda si truvava,
cu rami e parmi u salutava.

Ma tra u giojri je u patiri c’è na cruci!
Unna Cristu ‘ppì nujatri tutti, ava muriri!

MIRACOLO DEL CIECO
Mendicante

CIECO: Faciti a carità… Faciti a carità, a unu cc’un ci vidi.
Pirchì u Signuri a tutti i vusci guai provvidi!..
Faciti a carità…. Chi u Signuri vi duna a felicità..

Chi c’è, un mi tuccati, l’ucchi un ma ta tuccari.
Lassatimi stari… Lassatimi stari….

PIETRO: Maistru, no! ‘Nnu tuccari,
‘nnu capisci, st’omu a ccussì vo ristari!

CRISTO: St’omu ha statu sempri ‘nnu scuru funnu,
ma finu a quannu sugnu nni stà Terra,
sugnu a luci du munnu.

CIECO: No! un’mì tuccari, lassimi stari
L’ucchi mi stà facinnu brusciari.

…Ma! …Ma j cci viju, viju tuttu quantu.
Ma cu jè chiddu ca fattu stu purtentu?

CRISTO: Tu hai a fidi nnu figghiu di l’omu?

CIECO: Maistru cu jè? Dimmi di cu ad’aviri fidi unu chi finalmenti ccì vidi?

CRISTO: Sì! Ora tu ci vidi e jè propriu di chiddu chi ti parra chi ad’aviri fidi.

CIECO: J ti viju, o ma Signuri!
Miraculu….. Miraculu…….

ULTIMA CENA

Du jorna primu di la tristi morti
Cristu chi già sapiva la so sorti,

chiamà i dudici apustuli pp’à cena
mentri tutta ‘a so arma jera ‘npena.

Giuda Scariota, l’omu tradituri
Ava vinnutu già u so Signuri.

PIETRO: Maistru simmu cuntenti e felici
di passari ‘ccu tia sta festa

CRISTO: E j aju disiati ccu tuttu u ma cori
di passari a Pasqua ‘cu vujatri.
Je ‘ppi stà Pasqua chi vinni a stu munnu,
e ppi scunfiggiri u scuru funnu
Picca timpu aja stari ancora ‘cu vujatri
prima chi i ma carni vininu fragillati

Lavanda dei Piedi

.Ma Cristu chi ‘o Patri eternu ada turnari
Finu all’urtima ura ‘i voli amari.

Pigghia un vacili ccù i sò manu sanniti
e cci lava i pidi atutti quanti

Pitru Simuni assai murtificatu
cci dici chi un vò d’essiri lavatu

PIETRO: Tu sì ù ma Maistru je ù ma Signuri.
un po’ lavari i pidi o ‘n servituri.

CRISTO: Chiddu chi fazzu…. Tu ora u ‘nnu capisci.
Ma prima chi a ma vita si finisci
a tutti esempiu giustu vugghi dari,
di comu ‘nni stà terra v’hata amari.

Inno di Lode

Gloria ‘o Patri crijaturi
Gloria ‘o figghiu Ridinturi
Lodi ranni e summu amuri
Pp’à so eterna carità

O Patri Onnipotenti e gran Signuri
Tu si u rifuggiu d’ogni piccaturi,
pirchì si paci, bonta je ranni amuri.

Tu si a funtana d’a noscia ricchizza,
pirchì si gioia, carità e cirtizza.

Tu si a noscia fidi, a noscia spiranza
quannu a stù munnu l’odiu avanza.

Gloria a Maria, matri assai amurusa,
a Di ubbidienti duci spusa

chi nu so senu santu e mmaculatu
a Cristu Sarvaturi detti ‘u sciatu.

Tradimintu di Giuda

Chjni pui l’ucchi di chiantu e d’amarizza
Si setta e dici ccu ranni tristizza

CRISTO: Tuttu si fa secunnu i scritturi
‘mminzu di vuiatri c’è un tradituri
J mi nni vaiu a ma vita finisci
Ma guai a ‘d’omu chi ora mi tradisci!

Ranni sgumentu provunu l’amici,
Sintinnu ddi paroli chi ci dici;

Ognunu guarda ‘nfacci u ridinturi
E ci ddumana: Cu jè u tradituri?

GIOVANNI: Maistru, sugnu allura J chiddu chi t’ha tradiri?

PIETRO: Maistru, di cu parri, a cu ti riferisci?

CRISTO: L’omu chi mangia ‘nu ma stessu piattu
jè chiddu c’ha da fari stù misfattu!

GIUDA: Maistru, sugnu aluura j u malidittu?

CRISTO: Tu ha dittu!

E sempri ccù u so sguardu duci je onestu

Chiddu c’à fari, Giuda, fallu prestu.

Nuddu capiva chiddu chi diciva,
Ma Giuda turmintatu si nni iva.

Giuda chi u tradimintu ‘ncori aviva,
drittu.. drittu‘ndi Caifai si nni iva

E Cristu li talia a unu a unu,
Sgardu duci d’amuri e di pirdunu.

E pirduna ddu Giuda c’ha tradutu
E la so arma a Satana ha vinnutu.

Istituzione dell’Eucarestia

U jurnu si finisci e cala a sira
Silenziusa e fridda

A luna spunta a ‘mminzu li muntagni
E porta lustru ‘n tutti li campagni

E ‘ntantu dintra i mura di dda stanza,
Cristu rinnova ‘ntutti fidi e spranza.

CRISTO: Binidittu ni seculi u Signuri.

APOSTOLI: Binidittu ora e sempri u sò nomi
nni tutti i jorna e nni tutti l’uri

CRISTO: Pirchì nà binidittu cu i so liggi e datu u pani da terra
a tutti i giusti chi u munnu rinserra
D’ora ‘nnavanti stà festa ‘ppi tutti vujatri cangia significatu,
pirchi acquista un valuri assai cchiù atu
Je stà Pasqua chi trova
u passaggiu da scura morti a libertà da vita nova.

Chistu jè u pani da vita.
L’omu chi mangia stù pani vivrà ‘n’eternita infinita.

Sparti e duna ‘u pani da vita u gran Messia

CRISTO: Pigghiati e mangiatini tutti…
chistu jè u ma corpu je a carni mia
Facitilu vu iatri e facitulu fari
d’ora nnavanti a tutti l’atri
Mangiatilu ‘n memoria mia.

Binidittu ‘ni seculi u Signuri.

APOSTOLI: Binidittu ora e sempri u so nnomi
ppi tutti i jorna e tutti l’uri.

Chjnu un calici pui di russu vinu,
ringrazziannu a Dì, patri divinu
chiama tutti apustuli vicinu

CRISTO: Viviti, chistu jè u sangu di mà vini.

O sira biniditta, o jurnu santu,
Cristu si duna o munnu tuttu quantu!

Musica d’angiuli e canti divini
Mentri duna a so carni e li so vini!

CRISTO: D’ora ‘nnavanzi stù calici rapprisenta
u sangu da nova ed aterna alleanza,
virsatu ‘ppi tutti l’umini in segnu
di vera fidi e di vera spranza.
D’ora in pui je ppi ogni mumentu
u ma corpu diventa sacramentu

APOSTOLI: Ghoj e sempri a d’essiri lodatu
o to corpu sacramintatu

CRISTO: Pitru, Giuvanni e tutti,
Ora, vi vugghiu dari l’urtimu ‘nzignamintu:
prima chi u ma corpu, subisci u turmintu
“Amativi comu frati ‘nni sta terra
Unna c’è tantu odiu e sempri guerra”.
Ora lassu stu munnu e turnu o Patri,
Ma ristu sempri a ‘minzu di vuiatri.

Un c’è amuri, cchiù ranni di chiddu di
“Dari a vostra vita ppi vustru frati.”
Comu sta ppi fari u figghiu di l’eternu patri
Je chista a fidi ca ta prufissari
je chi ppi tuttu u munnu a ta pridicari

PIETRO: Signuri unna va tu i vugghiu iri
Ie ppi tia sugnu pronti ‘sina a muriri

CRISTO: Pitru! prima cu gaddu sta notti ada cantari,
Già ppi tri voti tu ma rinnigari

E pirduna a Pitru, bravu piscaturi,
Chi nega di canusciri u Signuri.

Pirduna tutti i piccati di stu munnu
Quannu u duluri u strazia ‘nsina ‘nfunnu

Pirdunu e amuri su i so palori
Mentri ‘na spata cci trapassa ‘u cori.

CRISTO: Patri l’ura à ‘rrivatu. Glorifica to figghiu,
pirchì iddu possa glorificari u to nomi.
Proteggi l’apustili chi m’à ‘ffidatu
Pirchi anchi iddi fanu parti
di nu regnu assaj cchiu atu
J sugnu a via, a virità, je a vita.

GETSEMANI

I (Prisintimintu)

Scinnì chiara la sira… e sutta a luna
Trimavanu d’ argentu a una a una

Di llulivi li pampini…Nnì ‘lurtu
U Nazarenu, già ccu cori murtu,

Trasì… L’ accumpagnavanu l’ amici,
Chiddi cchiù cunfidenti chi si fici.

L’ aria era chiara e la sira duci,
Ma chiaru e scuru furmavanu na cruci!

II (Suduri di sangu)

…E nnu silenziu arcanu du jardinu
Cristu trimà pinsannu o sò distinu.

Sancu sudà dda carni ‘mmaculata
Comu si fussi già ‘ncruci ‘nchiuvata!

Cadì, la facci ‘nterra ‘nginucchiuni priannu

CRISTO: Patri, pirchì m’ abbannuni?

O Patri Santu, alluntana di mia
Stu calici di feli e d’ agunia!

Ma si scrittu mi fù tantu patiri
Sia fattu allura u tò Santu vuliri!

III (Sulitudini)

Ranni lu scantu e ranni l’amarizza
Mentri u sangu culava stizza a stizza

Di dda carni ‘nnuccenti, marturiata
Già prima ancora d’ essiri ‘nchiuvata!

Russa si fici l’ erba unna pusava
la carni Santa chi sangu sudava!

E nunni potti cchiù… circà cunfurtru
Di cumpagni chi stavanu nni ‘lurtu…

Ma li truvà sfinuti ‘nsunnu chinu
Sutta i pampini muti du jardinu…

Ahi quantu ranni fu la pena, ahi quantu!
E Cristu dissi cu vuci di chiantu:

CRISTO: Mancu n’ ura vigghiastivu cu mia
nni stà notti di sangu e d’ agunia!

Stati vigghianti chi Satana arranca:
L’ anima è forti, ma la carni è stanca!

Ma l’ amici ristaru ‘nsunnu chinu
Sutta i pampini mutu du jardinu.

Nuddu ci detti aiutu ne cunsulu:
Nni stà terra cu soffri è sempri sulu!

CRISTO: Santi apustuli mia cchiù nnu durmiti,
L’ura du scuru funnu arrivatu
Sintu viniri ‘na gran compagnia,
Giuda davanti, ie apprissu i Iudia.

Giuda l’appi d’argentu a munita
Ma ccu Ddi ci persi a partita

Guadiri nnu si potti i sordi da’nfamiata
“Vai o’nfirnu cu l’arma to dannata”.

IV (Tradimento)

Tutta na vota si livà lu vintu,
Quasi chi l’ aria sintissi u tradimintu!

A luna si scurà…e fogghi e rami
Sbattivunu pinusi…passi e brami

Si ‘ntissiru ‘nni l’ urtu…senza sciatu
Si sbugghià ogni apustulu scantatu.

E già prima chi l’ ucchiu si nni dduna,
Eccu, armata di spati e di vastuna,

Na ciurma di vuccazzi mmilinati,
Comu cani di marcatu raggiati…

Ahi cori amaru comu suspittatu
C’era ‘n testa ddu Giuda assatanatu…

Si, propriu iddu, apustulu e ministru,
Ppi quattru sordi vinnì u sò Maistru!

Trenta dinari ci detti dda genti:
Ppi certuni na vita un costa nenti!

Giuda cchi fai? L’ amicu nun tradiri:
Si ancora ‘ntimpu: tirati ‘nnarriri!

E Cristu lu talia, Sguardu d’ agniddu
Duci e amurusu…ma ccu tuttu chiddu

Trova u curaggiu e resta tali e quali
E si fa avanti ppi dari u signali.

O signu snaturatu! U tradituri
Tradisci a Cristu ccu ‘nsignu d’ amuri!

Ci va e u basa d’ amicu liali
Chi ti duna u sò cori…A stù signali

Dda ciurma si rrivota cchiù caina,
Afferra u Nazarenu e lu ‘ncatina.

Ed eccu allura tutti trasudati,
Scappanu l’ apustuli scantati.

Nuddu ci detti aiutu ne cunsulu:
Nni stà terra cu soffri è sempri sulu!

Sulu! Mmenzu ddi vucchi ‘mmilinati,
Comu cani di marcatu raggiati!

Sulu! Tra li manazzi di ddi genti:
Ppi certuni na vita un costa nenti!

Sulu e ‘nnuccenti, agniddu ‘mmaculatu
di Caifa o tribunali trascinatu…

CAIFA

Sta lu gran Sacerdoti nnu so scannu,
a vucca stritta e ‘lucchi di ‘ngannu.

Tutti li Farisei su radunati
chi Cristu dissi sabburca ‘mbiancati.

Godi e sghignazza ognunu ‘nnu sò pittu,
ora chi ddu profeta ‘mmalidittu

ci l’hanu ‘nmanu, sulu je ‘ncatinatu,
di l’umini e di Di abbannunatu.

E parranu tri farsi tistimuni,
cuscienza lorda, acqua di vadduni;

ppi jccari a ‘nnucenza dintr’a fogna,
è leggittima e bona ogni minzogna!

Ma Cristu taci, la so vucca è chiusa,
tantu chi Caifa, cu pumpa maistusa,

CAIFA: si susi e dici:
Parra sciallaratu
l’omu chi taci ammetti u so piccatu
Ma ccu tuttu stu santu tribunali cerca giustizia,
allura chi signali chi provi duni da to ‘nuccenza;

Sinti, un ti vulimmu, trattariti comu nu criminali,
siddu t’ammu purtatu c’à jè ppi darini un signali.
Na pucu di dumanni ti vulimmu fari
e vulimmu sapiri pirchi tu, stai sempri a pridicari,
na liggi chi a tutti nujatri, u cilu a fattu nnivulari.

CRISTO: J aiu pridicatu ppi strati e ‘nzina nu tempiu,
Nenti aiu dittu a mucciuni e mancu aiu fattu scempiu
Pirchì dumanni a mia, dumannulu a chiddi chi manu scutatu.
Iddi u sanu chiddu c’haju dittu je sso cc’haju pridicatu.

Marcu di Iuda ccu la manu arzata
Detti a Cristu Gesù na timbulata

GUARDIA: Un si rispunnu di sta manera
A ‘n’omu chi ti po mindiri ‘ngalera

CRISTO: Si mali aju parratu
Dimmi unna aju sbagghiatu
Ma si giustu aiu rispunnutu
Pirchì un ma difinnutu!

GIUSEPPE
D’ARIMATEA: Caifa, j haiu ‘ntisu pridicari,
e ddi sicuru un’si po’ cunnannari!
mai nenti ha dittu contru a noscia fidi
e ppui a ggenti a tanti cosi un ci cridi.

ZERATH: Ha dittu chi è capaci di distrudiri u tempiu santu
e di rifallu ‘nni tri jorna tuttu quantu.
GIUSEPPE
D’ARIMATEA: Un c’è nuddu capaci di fari na cosa di chissa.
Chiddu c’ha dittu jè forsi un paraguni,
E nnu putimmu considerrari nu ‘mbrugghiuni.

CAIFA: I’nnomi di l’Etirnu, na dumanna ti vughiu fari
Ma duna accura cca a to risposta ti po’ cunnannari
‘nzumma ppa divina onnipotenza
affermi ancora d’essiri so figghiu?

Allura Cristu davanti ddu cunsigghiu
D’armi dannati e cori privinutu
Leva lu sguardu d’angilu patutu.

CRISTO: Chiddu chi dii tu i propria sugnu
e provi ‘n’aju datu e ti’nni dugnu.
A latu di l’Etirnu Crijaturi,
‘ncapu i nivuli, ‘ntuttu u so splenduri,
veni u figghiu di l’omu a giudicari,
ppi dari u santu premiu o cunnannari!

CAIFA: Bestemmia! Bestemmia scellerata!
‘Ntuppatici ssa vucca ‘ssatanata!

Caifa pari narmali scatinatu
L’ucchi di fora russu lu palatu
Si strazza la vistina e grida forti

CAIFA: U sintiti si merita la morti

E già lu so distinu fu signatu,
biancu gigghiu nnu fangu rruzulatu…

ZERATH: A morti! Jè reatu u so parrari
a ‘minzu du nuiatri un ci po’ stari!
Stutammuci la vita! A morti! A morti!
St’omu di stirru merita sta sorti!

NICODEMO: Vinni ccà a Gerusalemmi, je a genti persi a ragiuni,
si miritassi d’essiri trascinatu ‘nginucchiuni
e nuiatri ccammu fattu? fermi a talijari
comi e babbi chi l’acqua du mari vunu carmari.

E quanti voti n’ammu lamintatu pà vrigogna
cchi st’omu nu tempiu a fattu ccu ogni minzogna.

ZERAT: Senza rispittari tuttu stu santu tribunali,
E nemmenu Caifa chi je d’averu liali.

CAIFA: Basta, chi provi immu circannu ancora
un’ni basta chiddu c’a dittu ‘nzina a ora.
Purtatilu davanti o Procuraturi,
a jddu spetta giudicari stu bestemmiaturi.

E allura, comu lupi ‘ncaniati
di sciauru di sancu, ccu ‘manati

ccu sputi pugna e parulazzi ‘nfami
saziarunu la siti e la so fami.

C’è cu sfutti, cu ‘mmutta, cu ci ridi:
‘nsurti e sfregi di manu e di pidi!

Nuddu ci detti aiutu né cunsulu,
nni sta terra cu soffri è sempri sulu!

Sulu! ‘mmenzu ddi vucchi ‘mmilinati
comu cani di marcatu raggiati!

Sulu! Tra li manazzi di ddi genti:
ppi certuni na vita un costa nenti!

Sulu e ‘nnuccenti tutta dda nuttata
di stiddi amari e luna ‘nsaguinata!

Rinnegamento di Pietro

Mentri u distinu du so maistru iera già signatu
Pitru si nni stava sulue scunsulatu

Tre boti ci dumannaru a dda apustulu scantatu
Pirchì capiru chi iera amicu dì d’omu marturiatu

Ppi tri voti Pitru u rinnigà
e nni ddu mumentu u gaddu na vota cantà

POPOLO: Mi pari chi chistu je na micu fidatu
Di ddu nazzareno chi a tutti a ‘mbrughiatu

PIETRO: No! No! Lassimi stari
pirchi ji ccu ss’omu un c’haju vutu mai nenti a cchi fari

POPOLO: Ma… sbagghiu ma a cchistu haju vistu
Ccu ddu profeta farsu e tristu

PIETRO: Sbagghi di sicuru e no di picca ma d’assai
Pirchi a ss’omu chi dij tu ji unn’haju vistu mai

POPOLO: Si… je propia jddu, haju vistu pridicari ‘ncapu i muntagli
‘nzemmula a ddu ‘mbrugghiuni je a tutti l’atri so cumpagni

PIETRO: No lassatimi jri, u ‘nzugnu ji, lassatimi jri…

(canto del gallo)

E si leva u matinu da cunnanna
e Cristu fu purtatu a natra banna.

A lu palazzu di Ponziu Pilatu
‘ncatini comu latru trascinatu

PILATO

Di marmaru e culonni è lu Palazzu
Tempiu di liggi e casa di gran sfarzu.

Pilatu stà di judici rumanu
Rignanti a ‘nnomu di ‘nu re luntanu.

Scuta e talia, quasi ‘nfastidutu
Di dda ciurma di vucchi c’ha trasutu,

‘mmuttannu n’omu comu fussi agniddu
iccatu a li porti du maciddu.

ZERATH: Procuraturi ss‘omu je ranni piccaturi;
ha dittu chi è figghiu du Signuri.
Ppu Sinedriu jè reatu u so parrari:
Je a‘mminzu di nujatri un ci po’stari!

NICODEMO: Siddu ‘un forra un delinquenti
Un ta vissimu purtatu cca davanti.
Scutaci, grandissimu Ministru:
u fruttu marciu si leva du cannistru!

PILATO: Paci, je rispittu ppi Roma, je u ma dduviri
Chistu je‘n’affari religiusu je un c’entra ccu ma putiri.
Pigghiatulu e giudicatilu secunnu a voscia liggi?

ZERATH: Nujatri un’mputimmu dari morti a nuddu.
Si avissimu a giudicari cu a noscia liggi
Avissimu a cunnannari a mortti.

NICODEMO: Ma, c’é un fattu cchi ti pò ‘nteressari.
Iddu ha dittu chi jè Re di Giudei,
U Ridinturi attisu di l’Ibrei!
Farsu e ‘mbrugghiuni comu nu serpenti
Chi parra contru Roma e li putenti!

PILATO: U mmi ‘nderessa chiddu cca dittu
contro u vusciu tribbunali
Ma farisi Re je n’accusa troppu gravi
Purtatimillu cca davanti stu profeta
Vidimmu siddu unn’avi a cuscenza cujeta.

(Entra Gesù)

(‘Ntirrugatoriu)

Pilatu lu talia, pensa e ripensa,
‘un sa senti d’avillu ‘nna cuscenza….

Ddu Nazarenu chi ci sta davanti
Jè forsi un pazzu comu cci ‘né tanti,

ma ddu sguardu d’agniddu e d’acqua chiara
avi quarcosa… na ‘nnucenza rara
chi ti lassa sturdutu…s’avvicina e ci dici:

PILATO: Sti sacerdoti ti trascinunu davanti a mmia
Chi haju u putiri di vita e di morti
A mmia spetta apriri u chiudiri i porti …
Sugnu j u patruni du to distinu,
No chiddu cchi tu chiami patri divinu.
Ma dimmi allura
Pirchì sta genti voli a tò sbintura?
sta genti dici cchi tu ta fattu Re, si tu nu Re?

CRISTO: U regnu di cui parru ji, je assai chiu atu.
E sugnu rè ma no di stu munnu
E dicu u veru, u veru ‘nzina ‘nfunnu

PILATO: Ah! Allura si nu Re?!

CRISTO: Tu a dittu, je ppi chistu chi vinni o munnu
Ppi renniri testimonianza a verità
Cu je ppa virità scuta a ma vuci.

PILATO: A virità? Ma dimmi: unna stà
sta rara cosa chiamata virità?

CRISTO: Un gnè luntanu: jè cca davanti a tia
e cu cerca a sò vuci, trova a mia!

PILATO: Si propria pazzu, amicu chi raggiuni
di cilu e rose e ‘un ti nn’adduni
ca a vita ti si po’ livari
pircchì j sugnu ccà ppi giudicari.
Dici d’ essiri re! Ma d’unna mai?
U re porta la spata, la cruna,
e ‘ngustii e sfregi nuddu ci ‘ni duna!

( Rivolto ai Sacerdoti )

PILATO: St’omu je un pazzu, un pridicaturi
Je un truvu mancu na curpa di chiddi chi diciti

ZERATH: Sa fattu Re e je contro di lu statu
Stu pazzu rivoluzioni a pridicatu

(Rivolto verso Cristo)

PILATO: U sinti? ….Un dii nenti?
Unnu vidi quanti cosi dici sta genti?
Ti stajiu dannu a possibilità di difenniriti armenu.
Siddu un parri aggravi a to curpa, u capisci nazzarenu!

( Rivolto ai Sacerdoti e al popolo)

PILATO: Matu purtatu st’omu comu ribelli.
J haiu prucissatu davanti a vujatri
Ma un ci’haiu truvatu mancu na curpa
Je ‘nnuccenti ‘nnu puzzu cunnannari,
Basta sulu cu fazzu fraggillari

(Flaggellazione)

Allura quattru guardii lu pigghiaru
A la cullunna strittu lu taccaru

Ciangiti genti! Genti chi sintiti
si di carni nnu pittu cori aviti!

Tagghia l’aria lu nirbu comu spata,
bruscia li carni comu na vampata.

E scrusci e tagghia! Strazza a carni viva
di Cristu ‘marturiatu chi pativa.

O Cristu amuri, sancu di ‘nnuccenti,
ci riscatti cu tanti patimenti!

O Cristu santu! O vita chi si duna
a nostra vita! O santu chi pirduna

L’umana crita ribelli e superba
contr’u Signuri di stiddi e di l’erba!

(Cruna di spini)

Comu s’ancora un fussiru cuntenti
di tanti sancu e tanti patimenti,

Na cruna fanu ddi mani caini,
cruna ‘ntrizzata di zagugghi e spini!

1° CENTURIONE: Pi dari onuri e farici chiù festa,
sta cruna o re mindimmuccilla ‘n testa!

A curuna di spini cci cchiantava
E da frunti sangu ci culava

2° CENTURIONE: Nu re’ chi si rispetta e chi cumanna
avi lu scettru: dammuci sta canna.

3° CENTURIONE Ppi fallu cchiù precisu tuttu quantu
sapiti chi ‘ci vò? ‘Ci vo nu mantu!

4° CENTURIONE Evviva u re! Scruscimmuci li manu! ( o battimmuci i manu)

Baianu i vucchi comu firi cani,
mentri Pilatu mustra lu duluri
fattusi carni secunnu i scritturi

( Rientra Cristo )

PILATO: Ecce homo
Siti ancora cumminti da so curpa.

All’Ecce Homo ‘mputiri a viti
u figghiu di Maria nnu canusciti

Senza pietà ssi carni ‘fracillati,
chi tutti pugna e pidati ci dati

la fudda ‘llagannata un si sazzia
ppi d’omu voli tanti atri strazia

POPOLO: A morti! Cristu! A morti, Crucifissu!
S’ha cunnannari ora, ora stissu!

Ma ddi pouili ebrei ‘rrabiati,
contra di Gesù ieranu accaniti.

L’hanu ‘mputiri a Gesù Nazarenu
Di quantu guai e di stridi ci fanu!

PILATO: I sinti? …..Vunu a to mortti.
Pirchì un ‘mparri? Dii qualcosa avanti
Vo moriri ppi forza? Un ti vò sarbari?
Unnu capisci chi J haiu putiri di libberariti
O di fariti mintiri ‘ncruci?

E cristu, l’omu giustu cchiù tradutu
Leva lu sguardu d’angilu patutu

CRISTO: Tu Ponziu Pilatu
hai un putiri chi ta statu datu
dallu Re di li Re di tutti i genti
e senza u so vuliri un si nenti.

Pilatu sbarattatu di stu diri
Fici ricurssu a tuttu o so putiri

PILATO: Sacciu chi c’è l’usanza di liberari
‘un prigiuniru chi ppi Pasqua sa va giustizziari
Purtatimi un prigiuniri.

( Entra Barabba )

PILATO: Vuliti chi vi liberu a stu Cristu
O a Barabba, delinquenti e tristu?

POPOLO: Viva Barabba!
Je a cristu minti a morti !

Nun gnera genti chidda chi gridava
Ma fezza di taverna chi sbbuccava

POPOLO: A morti cristu! A morti, a morti ‘ncruci

Ahi lami di cutiddu furu i vuci
Chiova e sancu si fici ogni parola
Sancu e chiova e nuddu lu cunsola

(Rivolto a Cristo)

PILATO: Dimmi na parola e j ti sarbu.

PILATO: Faciti allura chiddu chi vuliti,
ma i ma manu restanu puliti!
Purtatimi un vacili e na tuvagghia:
‘un sugnu j u iudici chi sbagghia!

Pilatu fu d’Erodi privinutu
E la sentenza a morti ci a datu.

A Cruci ‘ncuddu e i manu ‘ttaccati,
pieta chi nuddu i giudei nni dati

1° Vuci : A morti, amorti! Chi si spetta ancora?
Pighiati a cruci purtammulu fora!

2° Vuci : U so sancu s’abbiviri u tirrenu!
Bedda ssa cruci: ti piaci nazarenu?

3° Vuci : Forza di dducu! Tu chi nni fai tanti
c’un sciusciuni sullevila all’istanti!

Tutti l’ebrei ieranu cuntenti
Su livaru u nazzarenu davanti

U purtaru a cruci u Signuri
Caifa iera u capu ‘mposituri

Chiddu chi Gesù vosi cunnannari
E i giurati so vosi ‘mmitari

E tra ddi brami chi inchiunu l’ariu
Cristu porta a so cruci a lu Carvariu…
CROCIFISSIONE

O iurnu amaru, o iurnu di duluri,
Arriva a lu Carvariu lu Signuri!

Giarna la facci, l’ossa rutti e stanchi
E ‘nsnguinati li so vesti bianchi…

U suli già si muccia nni muntagni
E sciaccanu la sira grida e lagni

E tra ddu ‘nfirnu di risati e chianti
Spoggianu lesti li so carni santi.

Di viviri lu feli veni l’ura
Ma Cristu accetta la so sorti dura

E ccu ‘ncestu di manu lu rifiuta
La ciurma di li guardi gia sa iuta

Ppi l’attu cchiu ‘nfamanti di sta scena
Ristata a signu da cchiu ranni pena.

Vrigogna ppi ccu vivi nni sta terra,
Vrigogna cchiù da fami e cchiù da guerra!

E lu martiddu sona la ‘ngunia
Chi si spanni luntanu ppi la via!

(Urla di Cristo)

Cchiù l’ura s’avvicina, cchiù si spacca
U cori di Maria chi ‘un si stacca.

Mancu un mumentu, un mumentu sulu
Du Figghiu senza aiutu né cunsulu…

Du Figghiu marturiatu senza fini,
u Figghiu sancu di so stessi vini.

Ora a Cruci nnu cilu spingi i vrazza
E u chiantu di Maria l’aria strazza!

Grida la Cruci all’ariu silinziusu
Si ‘llorda di lu sancu cchiù priziusu.

Inno alla croce

Eccu u lignu di la Cruci
Di la morti e di la gloria,
signu amaru nni la storia
persa nni l’oscurità!

Trunu e artaru du Signuri
Lignu nobili ppu chiantu
Chi ci fici Cristu Santu
Ppi la nostra libirtà!

Cruci aiutu di cu spera
Nni stu timpu di duluri,
facci stari cchiù sicuri
ppi la tua potistà!

Tu funtana di saluti,
ppi lu tò sacru misteru
‘nsigna a strata di lu veru
a la nostra umanità!

Simpri vivu da Cruci scurri u sancu
Sciumi chi lava tuttu u nostru fancu

China d’amuri chi riscatta u munnu!
E cu tuttu c’è ancora ‘ntunnu ‘ntunnu

Quarchi vucca di diavulu chi ridi:

I VOCE: Si ‘un scinni da Cruci, cu ci cridi
chi si u Figghiu di Dì?

II VOCE: Forza, chi fai?
Sarvasti a tanta genti n’minzu e guai
e un po’ fari un miraculu ppi tia?
Iecca ssi chiova, tantu si u Messia!

Ma Cristu, già ccu l’ucchi ‘nnivulati,
preia puri ppi ddarmi di dannati:

CRISTO: Patri, Patri pirdunali: ‘un sannu
quantu duluri e quantu mali fannu!

E vidinnu a Matri afflitta ranni
E accantu a Idda apustulu Giuanni

Duna l’urtimu fruttu du so amuri
U Crucifissu nustru Sarvaturi:

CRISTO: Eccu to figghiu, o Donna! O figghiu saggiu,
eccu tò Matri: dunaci curaggiu!

Gesù si dispunì e vosi muriri
Ppì vuliri u munnu riscattari

U iurni di giudiziu a da bbiniri
Ppì li vivi e li murti giudicari.

La Cruci contr’u cilu chi si scura
Minti nni tanti cori la paura,

chì ‘lluntananza si vidunu i lampi
tagghiari l’aria ‘ncapu di li campi…

preia Maria sutta di ddu Lignu
chi di la Terra iè l’arbulu cchiù dignu.

Pari na statua, marmaru ‘ncantatu,
mentri chiangi lu Figghiu svinturatu!

Coro

U duluri iè nu crividdu
Chi ti trasi nni la testa
E nu vintu di tempesta
Chi ti renni schiavu so.

E’ nu toru scatinatu,
è na petra senza forma,
è na funna scura gorna
chi ti ‘nghiutti comu vò.

Cianci Maria, cianciunu li stiddi,
cianci ccu i pugna ‘ncapu li capiddi,
cianci comu cianciunu li matri
di murti ‘mmazzati nni li strati!

U duluri iè na ruvetta
chi ti ppizza ‘nsina ‘nfunnu,
e la fezza di lu munnu
chi ti roba u senziu tò.

U duluri iè na muntagna
Chi ti cadi ‘ncapu i rini,
Chi ti ‘ntossica li vini,
chi ti stocca comu vò.

Cianci Maria, cianci a scatta feli
E percianu l’aria i laminteli!
E sciddica nnu cori na valata
Da matri nostra, matri sfurtunata!

Cianci comu na funtana
Chi ci ‘mmazzanu lu figghiu,
figghiu duci, figghiu gigghiu,
propria sutta l’ucchi so!

Rasca u funni du duluri:
Mori u so figghiu valenti
Cunnannatu di ‘nnuccenti,
cunfurtari ‘un si po’!

U so duluri arriva atu atu,
cianci Maria cu tuttu lu creatu!
U so duluri arriva ‘nsina a Dì,
cianci Maria e cianciu puru i!

( I Ladroni )

Du delinguenti stavanu a latu
du figghiu di Maria ‘ncruci nchjuvatu,

E uno di iddi chi iera cunnannatu
Dissi a ddu Cristu nnuccenti e marturiatu:

1° LADR.: Si si u figghiu di Ddì, pirchì un ti sarvi.
Iecca ssi chiova c’ha cchiantati
E sarvi macari a nujatri.

Ma u so cumpagnu accetta lu patiri
E rimprovira l’amicu ppu so diri:

2° LADR.: Un ‘naj timuri du Ridinturi?
Iddu fu cunnannatu
Ma senza curpa fu truvatu.
Oh! Signuri, di mia ta ricurdari,
quannu o Patri tò a riturnari.

CRISTO: Na vrità ti dicu; timuri unn’aviri,
chi oj stessu cu mia ‘nparadisu ada viniri!

Già u rintuccu sunà di l’ura nona,
u cilu fu spaccatu di li trona,

brama lu vintu comu n’arma pazza,
trapassa li muntagni e li strapazza…

Trona e lampa chi mintunu scantu:
tutti capiru chi iera nu Santu,

a dda genti ci rizzanu li carni
e si nni vanu ccu li facci giarni!

Tuttu si chjui secunnu li Scritturi
E bagnatu di sancu e di suduri

grida, mentr’i so forzi si nni vanu:

CRISTO: Affidu, Patri, l’arma nni to manu!

Cala la testa, penni senza sciatu
Tutt’u corpu di Cristu marturiatu!

Coro

Misericordia di st’agiri assurdu:
l’omu è comu urbu e comu surdu.

E mori ‘ncapu a Cruci nostru frati
U veru Figghiu di l’Eternu Patri.

E mori ‘ncapu a Cruci senza onuri,
senza piccatu tra li piccaturi!

Misericordia di st’agiri assurdu:
l’omu è comu urbu comu surdu.

Nni sta valli di lacrimi e turmenti
Misericordia ppi tò patimenti!

Marcu di Iuda fu lu cchiù crudeli
Ccu ‘ncurpu di lancia o pittu ci tira.

Barbara lancia cchi fusti raggiata
O pittu di Ddi fusti accanita

Maria va ciancinnu dispprizzata
Je nnu so santu visu sculurita.

SCINNENZA

Giseppi d’Arimatea va di Pilatu
Ppa’aviri di Gesù u corpu amatu.

Pilatul’accurdà… E Cristu santu
Fu di la matri strittu nnu sò mantu

PIETA’

Maria di dda sutta nun si rassava
U so nobili figghiu si cianciva
Ccu i so manuzzi u bbrazzava
e ‘ncapu i so ginocchia su mintiva
Je l’urtima basata ci dava
Pirchì jera l’urtima vota chu vidiva.

SEPOLCRO

‘Ndi na scura fossa fu purtatu
e di tutti i so discepoli seppellutu

Je du romani chi l’anu guardatu
Gesù cristu d’avanti ci ha spirutu.

‘Ndi stu sabburcu santu
c’è chiusu nostru signuri
morsi ‘ncruci e patì tantu
ppi nujatri piccaturi
ppu vusciu santu sangu
pirdunatici o signuri.

RESURREZIONE

Ghiurnà a duminica matina
Ppa via du sepulcru a Maddalena si ‘ncamina

Du donni pii si purtà idda pprissu
Ppi untari u corpu du crucifissu.

Dopu resuscitatu u signuri
L’angilu du patri a jutu a visitari

Iddu a chiamatu santu sarvaturi
Avutu murutu ppi tutti i piccaturi

Ora si risuscitatu o ma signuri
A grazzia voscia nu munnu u ‘mpo mancari

Ddi a ddi donni pii ‘nangilu divinu ci mannava
Chi a bona nutizzia a iddi ci purtava

Angilu di la paci,
fa sentiri a tò vuci

U jurnu di Ddi tantu suspiratu
Ecculu cca a gia spuntatu.

ANGELO: Oh Donna, chiddu ca vinutu a circari,
tu cca ‘nnu po’ truvari!
Cristu un gne cchiù tra i murti
Iddu je vivu dillu a tutti

A Maddalena ‘ncurrinnu si partiva
Je a bona nova a postuli je a Madonna ci purtava

MADDALENA: U signuri nnu sepulcru u nnaju truvatu
E ‘nagelu ma dittu ca resuscitatu.

S. TOMMASO: Ma cchi diji Maria u duluri ti fa sparrari
Je ‘mpossibili ccu maistru potti resuscitari.
Si stu fattu daveru sa verificatu
Vugghiu vidiri e tuccari u so custatu ‘nchiagatu

CRISTO: Vini Tummasu apustulu diffidenti
Si sempri tu chiddu chi un cridi a nenti
‘Nfila u to itu nu ma custatu
Accussi vidi si daveru haju resuscitatu.

S. TOMMASO: Pirdunatimi signuri
sugnu sempri un peccaturi

CRISTO: Tummasu in verità ti dicu
Beatu cu un vidi e cridi

CRISTO: E tutti vuiatri, ancora u patri haja turnari
Ma ni stu munnu ppi sempri haia ristari.

BEATITUDINI

Biniditti i poveri davanti a Ddi
Pirchì di iddi jè u so regnu.

Biniditti chiddi chi cianciunu
Pirchì Ddi ada cunsulari.

Biniditti l’umini di paci
Pirchì di iddi jè a terra di Ddi.

Biniditti chiddi chi fanu a vuluntà du Patri
Pirchi jddu ada ccuntintari.

Biniditti chiddi cchi anu pietà di l’atri
Pirchì u Patri avrà pietà di iddi.

Biniditti l’umini di cori
Pirchì ana vidiri Ddi.

Biniditti i pirsicuti chi fanu a vulanta du Patri
Pirchì di iddi jè u so regnu.

Biniditti siti vuatri quannu vi ‘nsurtanu e vi perseguitanu
Quannu vi ‘nfanganu ccu ‘nsurti e farsità
Pirchì siti i ma apustuli.

Stati felici e cuntenti
Pirchì u Patri di cili vi duna a gioia eterna.